Ахбор
Маърифати ҳуқуқӣ – омили муҳимми муқовимат ба коррупсия
Бо ташаббуси Бонки миллии Тоҷикистон дар ҳамбастагӣ бо Агентии назорати давлатии молиявӣ ва мубориза бо коррупсияи Ҷумҳурии Тоҷикистон 30 августи соли равон дар маҷлисгоҳи КВД Бонки амонатгузории Ҷумҳурии Тоҷикистон “Амонатбонк” ҷиҳати баланд бардоштани сатҳи маърифати ҳуқуқии кормандони низоми бонкӣ ва суғуртаи кишвар конференсияи ҷумҳуриявӣ таҳти унвони “Маърифати ҳуқуқии кормандони ташкилотҳои қарзии молиявӣ ва ташкилотҳои суғуртавӣ – омили муҳимми муқовимат ба коррупсия” баргузор гардид.
Дар оғози конференсия раиси Бонки миллии Тоҷикистон Толибзода Фирдавс Назримад ба намояндагони ташкилотҳои қарзии молиявӣ ва ташкилотҳои суғуртавӣ доир ба таъмини иҷрои стратегияҳои муқовимат ба коррупсия маълумот дода, қайд кард, ки дар даврони Истиқлол бо мақсади муқовимат ба коррупсия бо дастури Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон як силсила санадҳои меъёрии ҳуқуқӣ қабул гардиданд.
Бонки миллии Тоҷикистон ҷиҳати таъмини иҷрои стратегияҳои мазкур ва нақшаи чорабиниҳои амалисозии онҳо нақшаҳои кории дохилиидоравиро мунтазам таҳия ва тасдиқ карда, дар доираи онҳо як қатор чорабиниҳоро амалӣ менамояд. Аз ҷумла, дар асоси Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030 ва Нақшаи чорабиниҳои амалисозии он дар марҳилаи якум (солҳои 2021-2025), бо қарори Раёсати Бонки миллии Тоҷикистон Барнома оид ба муқовимат ба коррупсия барои давраи то соли 2030 тасдиқ карда шуда, ҳамасола Нақшаи чорабиниҳои БМТ оид ба муқовимат ба коррупсия таҳия мегардад.
Дар доираи ин Стратегия аз ҷониби Бонки миллии Тоҷикистон дар самти таҷдид ва такмили санадҳои меъёрии ҳуқуқӣ, таҳлили хавфҳои коррупсионӣ, автоматикунонии қабули ҳисобот аз субъектҳои хоҷагидорӣ, вусъат додани ҳисоббаробаркуниҳои ғайринақдӣ ва рақамикунонӣ, автоматикунонии механизми пардохти боҷҳои гумрукӣ ва андоз, баланд бардоштани масъулияти кормандони ташкилотҳои қарзии молиявӣ зимни додани қарзҳои бонкӣ ва дар ин замина такмил додани санадҳои меъёрии қарзӣ, ба нашр расонидани натиҷаи аудити ҳарсолаи ҳисоботи молиявӣ, тарғибу ташвиқ ва баланд бардоштани сатҳи маърифати ҳуқуқии зиддикоррупсионӣ, ташкил ва баргузор намудани вохӯрии кормандони БМТ бо мутахассисони Агентии назорати давлатии молиявӣ ва мубориза бо коррупсия ҷиҳати пешгирии амалҳои коррупсионӣ тадбирҳои зарурӣ анҷом дода мешаванд.
Сипас, муовини директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон Камолзода Фируз Анваралӣ дар бораи фаъолияти Агентӣ, таҳлили санҷишҳо ва санадҳои меъёрии ҳуқуқии низоми бонкӣ маърузаи мухтасар пешниҳод намуд. Зикр гардид, ки яке аз омилҳои асосии пешгирии ҳолатҳои коррупсионӣ ташаккули шууру фарҳанги ҳуқуқии касбии кормандони соҳа мебошад, ки ба риоя ва дақиқ иҷро шудани санадҳои меъёрии ҳуқуқии батанзимдарорандаи фаъолияти соҳа мусоидат менамояд.
“Боварӣ дорем, ки конфронси имруза, дар баробари мусоидат ба муқовимати дастаҷамъона ба ин зуҳуроти номатлуб, ҳамзамон ба баланд бардоштани сатҳу сифати фаъолияти масъулин, маърифати ҳуқуқӣ ва амалисозии дастуру ҳидоятҳои Президенти мамлакат дар ин самт самараи хуб хоҳад дод”, - гуфт Камолзода Фируз Анваралӣ.
Дар идома, намояндагони Бонки миллии Тоҷикистон, Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва КВД Бонки амонатгузории Ҷумҳурии Тоҷикистон “Амонатбонк” барои иштирокдорони конференсия дар мавзуъҳои “Чораҳои пешгирии коррупсия дар низоми бонкӣ”, “Усулҳои пешгирии коррупсия дар низоми бонкӣ”, “Заминаҳои пайдоиш, омилҳо ва вазъи содиршавии ҷиноятҳои коррупсионӣ дар соҳаи бонкӣ”, “Таҷрибаи КВД БА ҶТ “Амонатбонк” дар татбиқи барномаҳои давлатии зиддикоррупсионӣ”, “Экспертизаи давлатии санадҳои меъёрии ҳуқуқӣ омили баланд бардоштани маърифати ҳуқуқии кормандони соҳаи бонк” ва “Фаъолияти суғуртавӣ дар Ҷумҳурии Тоҷикистон ва нақши БМТ дар баланд бардоштани маърифати ҳуқуқӣ-зиддикоррупсионии низоми суғурта” бо пешниҳоди рӯнамоҳо суханронӣ карданд.
Дар қисмати ҷамъбастии чорабинӣ ташкилкунандагони конференсия бо истинод ба суханони Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон “Яке аз хатарҳое, ки метавонад ба раванди рушди устувори давлат монеа гардад ва ба эътибору обрӯи он дар арсаи байналмилалӣ таъсири манфӣ расонад, коррупсия мебошад. Имрӯз зарур аст, ки барои паст кардани сатҳи коррупсия ҷомеаи шаҳрвандӣ низ дар канор набошад ва барои мубориза бар зидди ин кирдори нангин бо сохторҳои давлатӣ бештар ҳамкорӣ намояд” аз иштирокдорон даъват ба амал оварданд, ки ҷиҳати пешгирии амалҳои коррупсионӣ ҳамчун шаҳрванд фаъолнокӣ нишон дода, дониш ва неруи худро ба ҳифзи манфиатҳои милливу давлатӣ равона созанд. Зеро пешгирию бартараф намудани амалҳои коррупсионӣ, муқовимат ба ин зуҳуроти нангин вазифаи танҳо мақомоти ҳифзи ҳуқуқ набуда, кори дастаҷамъӣ мебошад.
Шуъбаи матбуоти
БМТ
Диданд: 940
30.08.2024