Баргузории фестивали “Саводнокии молиявӣ” дар шаҳраки Ғарм

---

Бо ташаббуси Бонки миллии Тоҷикистон ва намояндагони ташкилотҳои қарзии молиявӣ, ташкилотҳои суғуртавӣ ва шарикони рушд 25 июли соли 2024 дар Кохи фарҳанги шаҳраки Ғарм фестивали “Саводнокии молиявӣ” баргузор гардид.

Дар маросими кушодашавии фестивал муовини якуми раиси ноҳияи Рашт Ҳандулло Шарифзода ва сардори идораи ҳимояи ҳуқуқҳои истеъмолкунандагони хизматрасониҳои молиявии Бонки миллии Тоҷикистон Далер Муродалиев суханронӣ намуда, ҳадаф аз баргузории чорабинии мазкурро баланд бардоштани сатҳи саводнокии молиявии аҳолӣ арзёбӣ намуданд.

Сипас, аз ҷониби мутахассисони Бонки миллии Тоҷикистон ва намояндагони ташкилотҳои қарзии молиявӣ барои иштирокдорони фестивал доир ба мавзуъҳои “Рушди ҳисоббаробаркунии ғайринақдӣ дар заминаи технологияҳои муосир”, “Пешгирии амалҳои қаллобони молиявӣ”, “Муҳиммияти саводнокии молиявӣ” ва “Саводнокии молиявӣ дар рушди тиҷорат” рӯнамоҳо пешниҳод гардида, вобаста ба мавзуъҳои фестивал озмунҳо гузаронида шуданд.

Дар қисмати дуюми чорабинӣ намоиши маҳсулоти ташкилотҳои молиявӣ ва суғуртавӣ доир гардид. Ташкилотҳои қарзии молиявӣ, суғуртавӣ ва соҳибкорони инфиродӣ ба тамошобинони фестивал маҳсулоти худро муаррифӣ намуданд.

Ҳамзамон, барномаи фарҳангии ҳунармандони варзида ба чорабинии мазкур шукӯҳи тоза бахшида, табъи иштирокдорони фестивалро болида гардонид.

Диданд: 4787

30.07.2024